Torne Nadau

Arribe Nadau

e era gibra capère es vinhes e es gèrms

aqueres nets escures

de gisca talhenta com eth veire.

Quin hered!

Aguest Nadau voi qu’era tronca

torne a alugar es ahlames

que mantien era vida

e qu’eth huec escampe eth hum

com ua petita e doça atmosfèra

pera ciutat des umans.

Aguest Nadau voi tornar a sénter era aulor dera mossa,

flaira arcaïca qu’explique eth mistèri

antic des inicis,

e trobar ena pèth era doçor deth sòn tacte,

com era prumèra careça.

Aguest Nadau voi qu’era alend tèbia deth bò ena grípia

mos rebrembe tostemp es causes que son essenciaus,

sustot er aire blos,

entà qu’era vida seguisque.

Alend deth bò umil...

resum der existir.

Aguest Nadau voi tornar a veir a lúder es fruts deth visc,

pèrles ludentes que penjarè en casa,

un còp mès.

Delicadi senhaus d’uns tempsi milhors qu’an d’arribar

e que sauven era anma dera vida

quan tot se gèle.

Aguest Nadau guarniram er arbe d’aubienh

e cantaram cançons ath torn.

Serà un moment a on era vida

tornarà a nèisher despolhada

en cada còr.

E alavetz,

toti mos daram era man.

Jordi Manyà

Traduccion: Verònica Barès

(Looking for people interested in translating this poem in other languages)